३४औँ अन्तर्राष्ट्रिय अपाङ्गता दिवस आज विभिन्न कार्यक्रमसहित देशभर मनाइँदै

Ecoecopolitics Desk२ महिना अगाडि

अपाङ्गता भएका व्यक्तिहरूको ३४औँ अन्तर्राष्ट्रिय दिवस आज (बुधबार) नेपालसहित विश्वभर विभिन्न कार्यक्रमका साथ मनाइँदैछ। सरकार, सरोकारवाला निकाय र अपाङ्गता क्षेत्रमा सक्रिय संघ–संस्थाले जनचेतनामूलक अभियान, सम्मान कार्यक्रम तथा छलफलसहितका गतिविधि सञ्चालन गरेका छन्। संयुक्त राष्ट्रसङ्घले सन १९९२ देखि हरेक वर्ष डिसेम्बर ३ मा यो दिवस मनाइँदै आएको हो।

यस वर्षको नारा ‘अपाङ्गता समावेशी समाजको प्रवर्द्धन : सामाजिक उन्नतिको संवर्द्धन’ तय गरिएको छ। दिवसले अपाङ्गता भएका व्यक्तिहरूका अधिकार, समानता र समावेशितालाई सुनिश्चित गर्दै सबैको सहभागितामा उन्नत समाज निर्माण गर्नुपर्ने संदेश दिएको छ। नेपालमा पनि सार्वजनिक स्थान, कार्यालय, विद्यालय, सडक, पार्क तथा धार्मिक स्थलहरूमा अपाङ्गता मैत्री संरचना र वातावरण निर्माणको आवश्यकता झनै महसुस भइरहेको छ।

यद्यपि संविधानले अपाङ्गता भएका नागरिकलाई सम्मानजनक जीवन, समान पहुँच र अधिकार सुनिश्चित गरे पनि व्यवहारिक रूपमा ती प्रावधानहरूको पूर्ण कार्यान्वयन हुन सकेको छैन। सरोकारवालाहरूले शिक्षा, स्वास्थ्य, रोजगार र सार्वजनिक सेवामा पहुँचयोग्यता विस्तार गर्दै अपाङ्गता भएका व्यक्तिहरूलाई वास्तविक रूपमा समावेशी समाजको अनुभूति गराउने नीति तथा कार्यक्रम प्रभावकारी बनाउनु पर्ने माग गरेका छन्।