एमाले महाधिवेशनमा मतदान सम्पन्न : २२६३ मध्ये २२२७ मत खस्यो

Ecoecopolitics Desk१५ घण्टा अगाडि

काठमाडौँ । नेकपा (एमाले) को महाधिवेशनअन्तर्गत नयाँ नेतृत्व चयनका लागि भएको मतदान प्रक्रिया सम्पन्न भएको छ। निर्वाचन समितिका अनुसार कुल २२६३ मतदातामध्ये २२२७ जनाले मतदान गरेका छन्।

मतदान सकिएसँगै मतगणनाको तयारी थालिएको निर्वाचन आयोगले जनाएको छ। मतपेटिका सिल गर्ने, मतपत्र व्यवस्थापन तथा प्राविधिक प्रक्रिया पूरा भएपछि तीन घण्टाभित्र नतिजा सार्वजनिक गरिने तयारी गरिएको छ।

निर्वाचन प्रक्रिया शान्तिपूर्ण रूपमा सम्पन्न भएको भन्दै आयोगले कुनै अप्रिय घटना नभएको जानकारी दिएको छ। महाधिवेशनमार्फत अध्यक्ष, उपाध्यक्ष, महासचिव, उपमहासचिवसहित केन्द्रीय कमिटीका पदाधिकारी तथा सदस्य चयन गरिँदैछन्।

मतदान सम्पन्न भएसँगै महाधिवेशन स्थलमा उम्मेदवार, प्रतिनिधि तथा समर्थकहरू नतिजाको प्रतीक्षामा रहेका छन्। नतिजा सार्वजनिक भएपछि एमालेको नयाँ नेतृत्व औपचारिक रूपमा घोषणा गरिनेछ।